تانگ ملن دی مار گئی اے – زین شکیل

تانگ ملن دی مار گئی اے مائے نی
جندڑی رو رو ہار گئی اے مائے نی
اکھیاں بدلاں وانگوں وسن ہر ویلے
دھپ یاداں دی ساڑ گئی اے مائے نی
رُت وچھوڑے والی میری جندڑی نوں
دکھ سولی تے چاڑھ گئی اے مائے نی
یار دی بیڑی میرے ہنجواں وچ تردی
لنگھ اکھیاں توں پار گئی اے مائے نی
سکھ دی بدلی میرے ویڑھے وچ آ کے
روندی زار قطار گئی اے مائے نی
چپ چپیتے دکھاں نال بھری برچھی
کھب سینے وچکار گئی اے مائے نی
زین دناں دے شکوے کرئیے نال کدھے
سانوں شام اجاڑ گئی اے مائے نی
زین شکیل
Share:

Leave a Reply

Your email address will not be published.

This site uses Akismet to reduce spam. Learn how your comment data is processed.